ដោយ : បន្ទាយ

បាត់ដំបង៖ក្មេងស្រីម្នាក់បានបើកបរម៉ូតូធ្លាក់ជង្ហុកដួល ក៏ត្រូវរថយន្តបើកកិនពីលើបណ្តាលឲ្យរងរបួសធ្ងន់កាលពីវេលាម៉ោង១៣និង៤០នាទី ថ្ងៃទី០៤ ខែកញ្ញា ឆ្នាំ២០២៤ នៅចំណុចផ្លូវបំបែកមួយកន្លែង ស្ថិតក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង។

ប្រភពពីប្រជាពលរដ្ឋបានឲ្យ Cambodia Flash News (CFN) ដឹងថា : មុនកើតហេតុ គេឃើញម៉ូតូម៉ាក HONDA TODAY ពណ៌ឈាមជ្រូកមួយគ្រឿង ពាក់ផ្លាកលេខបាត់ដំបង 1AT-1813 បើកបរដោយក្មេងស្រីម្នាក់អាយុប្រហែល១៥ឆ្នាំ ទិសដៅពីលិចទៅកើត។លុះមកដល់ចំណុចកើតហេតុខាងលើបានធ្លាក់ជង្ហុកដួល ក៏ត្រូវរថយន្តម៉ាក Highlander ពណ៌ស ០១គ្រឿង បើកបរទិសដៅពីកើតទៅលិច ជ្រុលមកកិនពីលើបណ្តាលឲ្យរងរបួសធ្ងន់។

ក្រោយពេលកើតហេតុរថយន្តបានបន្ថែមល្បឿនរត់គេចបាត់ទៅ។ ចំណែកជនរងគ្រោះត្រូវបានសមត្ថកិច្ចជំនាញដឹកបញ្ជូនទៅសង្គ្រោះព្យាបាលនៅមន្ទីរពេទ្យ៕